Það var þétt setið í Norðurljósasal Hörpu 3. maí sl. þar sem Loftslagsdagurinn 2022 fór fram. Þar komu fram helstu sérfræðingar þjóðarinnar í loftslagsmálum og fjölluðu um málaflokkinn á aðgengilegan hátt. 

Þátttaka í Loftslagsdeginum fór fram úr vonum og færri komust að en vildu í Hörpu. Viðburðinum var einnig streymt á heimasíðu ráðstefnunnar og fréttamiðlum RÚV og Vísis.  

Horfa á upptöku af Loftslagsdeginum.

Mynd: Það var húsfyllir í Norðurljósasal Hörpu / Ljósm: Gunnar Sverrisson.

Þróun loftslagsmála á Íslandi

Fyrsti hluti dagskrárinnar var tileinkaður losun og þróun loftslagsmála á Íslandi. Nicole Keller og Ásta Karen Helgadóttir, sérfræðingar í teymi losunarbókhalds, fóru yfir nýjustu upplýsingar um losun Íslands í mismunandi geirum og hvernig framtíðin lítur út.

Sjá nánar í samantekt á niðurstöðum Landsskýrslu um losun gróðurhúsalofttegunda á Íslandi. 

Mynd: Ásta Karen Helgadóttir, sérfræðingur í teymi losunarbókhalds í viðtali hjá RÚV / Ljósm: Gunnar Sverrisson.

Loftslagsmál frá ýmsum sjónarhornum

Á dagskrá voru 19 erindi í fjórum málstofum:

• Hver er losun Íslands og hvaða tól höfum við til að rýna hana?
• Losunarbókhald í stærra samhengi
• Lausnir og aðlögun: Hvert erum við komin og hvernig er hægt að bregðast við afleiðingunum?
• Orkuskipti

Erindin fluttu sérfræðingar frá Umhverfisstofnun og eftirfarandi samstarfsaðilum: Hafrannsóknarstofnun, Hagstofu Íslands, Háskóla Íslands, Landgræðslunni, Landsvirkjun, Loftslagsráði, Náttúrufræðistofnun Íslands, Orkustofnun, Skógræktinni og Veðurstofu Íslands. 

Fundarstjóri var Stefán Gíslason, framkvæmdastjóri Environice. 

Skoða dagskrá Loftslagsdagsins.

Mynd: Jóhannes B. Urbancic Tómasson, sérfræðingur í teymi hringrásarhagkerfis, fjallaði um grænt bókhald ríkisstofnana / Ljósm: Gunnar Sverrisson.

Loftslagsaðgerðir í sýndarveruleika

Í hádegishléi var sýning á hlutverkaleik um loftslagsaðgerðir sem fer fram í sýndarveruleika. Leikurinn nefnist Garden of Choices og er hluti af verkefninu Astrid Loftslagsfræðsla sem er leitt af hönnunarfyrirtækinu Gagarín.

Þátttakendur í leiknum voru Unnur Björnsdóttir, listkennaranemi, Egill Hermannsson, varaformaður Ungra umhverfissinna, Vilhjálmur Árnason, Alþingismaður og formaður umhverfis- og samgöngunefndar Alþingis, Þórunn Wolfram Pétursdóttir, sviðsstjóri hjá Landgræðslunni og Andrés Ingi Jónsson, alþingismaður. 

Leikurinn var spilaður á sviðinu í salnum og áhorfendur gátu fylgst með á skjá. 

Mynd: Þátttakendur í hlutverkaleik um loftslagsaðgerðir sem spilaður er í sýndarveruleika / Ljósm: Gunnar Sverrisson.

CO₂ áskorun

Þátttakendur í Loftslagsdeginum gátu tekið þátt í CO₂ áskorun. Hún fólst í því að reyna að lyfta þyngd sem nemur viku útblæstri frá bensínbíl. CO₂ áskorunin var í boði Vistorku og snýst um að gera koltvísýring áþreifanlegri til að auka vitund fólks. 

Mynd: Vilhjálmur Árnason, Alþingismaður og formaður umhverfis- og samgöngunefndar Alþingis tekur þátt í CO2 áskoruninni / Ljósm: Gunnar Sverrisson.

Einfaldari umræða og aukin vitund

Markmið Loftslagsdagsins er að fjalla um loftslagsmál í íslensku samhengi þannig að sem flestir geta tileinkað sér umræðuna. Við undirbúning var lögð sérstök áhersla á að einfalda umræðuna, samræma skilaboð og halda fagmáli í lágmarki. Það skilar sér vonandi í aukinni vitund almennings um loftslagsmál og helstu aðgerðir. 

Sem fyrr segir var frábær þátttaka á staðnum og í streymi og ljóst að Loftslagsdagurinn er kominn til að vera.

Sjáumst að ári! 

Mynd: Stefán Gíslason var fundarstjóri Loftslagsdagsins 2022 / Ljósm: Gunnar Sverrisson.

Tengt efni:

• Heimasíða Loftslagsdagsins
• Myndir frá Loftslagsdeginum 
• Samantekt á niðurstöðum Landsskýrslu um losun gróðurhúsalofttegunda á Íslandi
• Losun gróðurhúsalofttegunda