Eldsneyti

  1. Hvaða reglur gilda um innihald eldsneytis á Íslandi?

    Á Íslandi gildir reglugerð nr. 960/2016 um gæði eldsneytis.
     
  2. Er hægt að nálgast upplýsingar um innflutt eldsneyti einhverstaðar?

    Ísland skilar árlega af sér skýrslum um efnainnihald innflutts eldsneytis. Hægt er að skoða þessar skýrslur hér.
     
  3. Liggur allt tengt eldsneytismálum hjá Umhverfisstofnun?

    Nei, Umhverfisstofnun fylgist með efnainnihaldi fyrst og fremst og þessi málaflokkur er víðtækur og fellur undir fleiri stofnanir, t.d. Orkustofnun.
     
  4. Hvað er svartolía?

    Svartolía samanstendur af þungum kolefnasameindum með hátt suðumark og hefur yfirleitt hátt brennisteinsinnihald, sem má að hámarki vera 3,5% (m/m). Svartolía er mikið notuð sem skipaeldsneyti sökum þess að hún er ódýr og vélar skipanna geta nýtt það. Til þess að mæta kröfum um brennisteinsinnihald er oft notaður hreinsibúnaður á útblæstrinum sem hreinsar burt brennisteinsoxíð sem myndast. Þessi olía eimast við hátt hitastig og inniheldur sökum þess oftast meiri óhreinindi en olía með lægra suðumark.

  5. Er svartolía bönnuð í kringum Ísland?

    Nei, það er löglegt að brenna svartolíu í kringum strendur landsins. Það eru hinsvegar sum skip sem þurfa að nota losunar minnkunar aðferðir til mæta kröfum og mega nota það.

  6. Má brenna svartolíu í höfn?

    Það má ekki brenna eldsneyti með meira en 0,1% brennisteinsinnihald í höfnum án minnkunaraðferða á losun við bruna þess sem gerir það að verkum að bruni þess er sambærilegur gasolíu í losun.

  7. Er skip að brenna svartolíu ef að reykurinn úr því er svartur?

    Það er ekki hægt að segja neitt um það, svartur reykur getur komið til af mörgum ástæðum.

  8. Er skip að brenna svartolíu ef það kemur gulur reykur úr því?

    Það er hugsanlegt, guli liturinn getur bent til þess að hátt hlutfall brennisteins sé til staðar og svartolía má innihalda allt að 3,5% brennistein, meðan að í gasolíu sem má brenna við höfn er það aðeins 0,1%.

  9. Hvaða reglugerð gildir um efnamál bensínstöðva sem Umhverfisstofnun hefur umsjón með?

    Reglugerð nr. 471/2016 um kerfi til endurheimtar bensíngufu.

  10. Hvaða afskipti hefur teymi efnamála af bensínstöðvum?

    Teymið hefur eingöngu afskipti af kerfi til endurheimtar bensíngufu, en önnur teymi innan stofnarinnar hafa afskipti af öðrum málum.

  11. Hverjar eru kröfur um endurheimt bensíngufu á bensínstöðvum?
     
    Virkni kerfa til endurheimtar bensíngufu skal vera 85% og þau skulu vera til staðar á bensínstöðvum ef árlegt gegnumstreymi fer yfir ákveðin mörk, sem sjá má í 47. gr. e. í efnalögum nr. 61/2016.