Eftirlit

Markmið eftirlits er að sjá til þess að lögum og reglum sé framfylgt. Í því felst meðal annars að hækka söfnunarhlutfall þessa úrgangs, fylgja eftir banni og takmörkunum á ákveðnum efnum í rafhlöðum og rafgeymum og sjá til þess að upplýsingagjöf til viðskiptavina sé framfylgt. Því er mikilvægt að verkefnið sé unnið í góðu samstarfi við aðila á markaði og að allir hlutaaðeigandi komi að því að hvetja notendur til að skila úrganginum rétt af sér. Umhverfisstofnun hefur sett upp eftirlitsáætlun til ársloka 2023. Í henni er lögð áhersla á eftirlit með skyldum sveitarfélaga um móttöku rafhlaða, rafgeyma og raf- og rafeindatækjaúrgangs í samstarfi við heilbrigðieftirlitin. Þá verður farið í eftirlit til þeirra sem framleiða rafhlöður, rafgeyma og raf- og rafeindatæki á Íslandi og áhersla lögð á fræðslu og miðlun á þessum málaflokki. 

Söfnunarhlutfall á færanlegum rafhlöðum og rafgeymum náði markmiði ársins 2020 um 65% söfunarhlutfall árið 2018. Söfnunarhlutfallinu hefur verið haldið uppi af söfnun blýsýrurafgeyma, því lengi vel var söfnunarhlutfall rafhlaðna einungis rúmlega 30%, en árið 2020 náði það þó 40%. Því er mikilvægt að fræða almenning og fyrirtæki um söfnun og rétta förgun á slíkum úrgangi.