Stök frétt

Mikilvægt er að vanda valið við kaup á andlitslitum fyrir öskudaginn. Andlitslitir teljast bæði til snyrtivara og leikfanga og verða því að uppfylla ákvæði reglugerða um slíkar vörur. Litirnir skulu vera CE merktir og á umbúðum þeirra skulu vera upplýsingar um innihaldsefni svo að hægt sé að forðast liti með ákveðnum efnum. 

Andlitslitir geta innihaldið litarefni, ilmefni og rotvarnarefni sem geta verið varasöm. Mörg litarefni og ilmefni geta valdið ofnæmi eða verið ertandi og geta rotvarnarefni eins og paraben haft hormónaraskandi áhrif. 

Paraben geta farið inn um húðina og meðal annars haft hormónahermandi áhrif í vefjum líkamans með því að líkja eftir estrógeni og öðrum hormónum. Athygli er vakin á því að nýlega var framleiðsla snyrtivara með eftirfarandi gerðum parabena bönnuð hér á landi og annarsstaðar í Evrópu og verður bannað að selja snyrtivörur sem innihalda þau paraben eftir 30. júlí nk.: Isoprobylparaben, Isobutylparaben, Phenylparaben, Benzylparaben og Pentylparaben. 

Umhverfisstofnun hvetur fólk að hafa samband við stofnunina ef þau sjá liti í verslunum sem uppfylla ekki kröfur t.d. um merkingar.