Föstudaginn 12. apríl síðastliðinn skilaði Umhverfisstofnun skýrslu um losun gróðurhúsalofttegunda á Íslandi frá árinu 1990 til 2015 (National Inventory Report) til loftslagssamnings Sameinuðu þjóðanna. Í skýrslunni er að finna ítarlegar upplýsingar um losun gróðurhúsalofttegunda á Íslandi, hvernig losunin hefur þróast frá árinu 1990 ásamt lýsingu á aðferðafræðinni sem er notuð við útreikningana.

Árið 2015 var losunin 4.538 kílótonn af CO₂-ígildum sem er 28% aukning frá árinu 1990 (3.541 kt. CO₂-íg.) og tæplega 2% aukning frá árinu 2014 (4.454 kt. CO₂-íg.). Losun gróðurhúsalofttegunda á hvern íbúa á Íslandi árið 2015 var 13,8 tonn, en 13,6 tonn árið 2014 og 14 tonn árið 1990.

Losuninni er skipt í fimm flokka eftir því hver uppspretta losunarinnar er. Flokkarnir eru orka, iðnaðarferlar, landbúnaður, úrgangur og landnotkun, breytt landnotkun og skógrækt (Land use, land use change and forestry - LULUCF). Losun frá LULUCF fellur ekki undir skuldbindingar Íslands í loftslagsmálum. Í töflunni og myndinni hér að neðan má sjá hvernig losun Íslands skiptist milli mismunandi flokka og hefur þróast frá árinu 1990. Helsta aukningin frá árinu 1990 hefur átt sér stað í losun frá  iðnaðarferlum, 111,8%. Losun frá úrgangi hefur einnig aukist verulega, eða um 26,5% frá árinu 1990. Losun frá bæði orku og landbúnaði hefur þó dregist saman um tæplega 5% miðað við árið 1990.

Árið 2015 komu 44% af losun Íslands (án landnotkunar) frá iðnaðarferlum, 37% frá orku, 14% frá landbúnaði og 5% frá úrgangi. Yfir 88%  (1.322 kt. CO₂-íg.) af þeirri losun sem fellur undir orkuflokkinn er til komin vegna bruna á jarðefnaeldsneyti. 40% af losuninni kom frá rekstraraðilum staðbundins iðnaðar er fellur undir viðskiptakerfi ESB með losunarheimildir og greiddu því rekstraraðilar eina losunarheimild fyrir hvert losað tonn.