Námskeið

Skiptir máli í hvaða röð ég tek veiðikorta- og skotvopnanámskeiðið?

Nei það skiptir ekki máli í hvaða röð námskeiðin eru tekin. Þetta eru tvö aðskilin námskeið.

Ef þú vilt einungis fá skotvopnaleyfi til að stunda skotfimi en ekki stunda veiðar þarftu ekki að fara á veiðkortanámskeiðið

Hvernig fara stafrænu námskeiðin fram? 

Þegar þú hefur skráð þig á námskeið í gegnum skráningarsíðuna og gengið frá greiðslu, færðu Teams-hlekk sendan í tölvupósti. 

Þú fylgist svo með fyrirlestrinum í gegnum tölvu eða snjalltæki á tilsettum tíma. 

Þú tekur svo stafrænt krossapróf með fartölvu eða snjalltæki á þeim próftökustað sem þú valdir þér í skráningarferlinu.

Ég er veik og kemst ekki á námskeiðið. Hvernig sný ég mér í því?

Ef þú forfallast vegna veikinda getur þú fengið sendan hlekk til að horfa á námskeiðið seinna. 

Þú finnur svo heppilegann próftíma á skráningarsíðunni.

Hvað þarf ég að gera til að taka þátt í skotvopnanámskeiði?

• Hafa náð 20 ára aldri til þess að geta fengið skotvopnaleyfi. 
• Skrá þig á námskeið. Sjá næstu námskeið.
• Skila læknisvottorði og passamynd inn til lögreglunnar í því umdæmi sem þú átt lögheimili í með góðum fyrirvara fyrir námskeiðið.
• Sækja um sakavottorð hjá lögreglunni um leið og þú skilar inn læknisvottorði og passamynd.
• Lögreglan þarf að hafa fengið öll gögn frá þér minnst tveim vikum fyrir námskeiðið til þess að þú eigir möguleika á að vera samþykkt/ur á námskeiðið.
• Kynna þér viðfangsefnið vel áður en námskeið hefst.
• Mæta á námskeiðið og taka próf.

Ég get ekki mætt á þeim tíma sem verklegi hluti skotvopnanámskeiðsins er auglýstur. Get ég mætt á öðrum tíma?

Ekki skiptir máli á hvaða skotvopnanámskeiði farið er í verklega hlutann. Hægt er að fresta honum. 

Best er að ná samkomulagi við kennarann á skotvopnanámskeiðinu þegar það hefst um annan tíma fyrir verklega hlutann. Hægt er að fá að mæta með þeim hóp sem er á næsta námskeiði.

Lögreglan gefur ekki út skírteini fyrr en búið er að staðfesta að viðkomandi hafi lokið verklega hlutanum.

Að jafnaði er einkunn ekki send út fyrr en báðum námshlutum er lokið.

Ég er búinn að vera með skotvopnaleyfi í mörg ár og var að veiða fyrir tilkomu veiðikortakerfisins. Hef hins vegar aldrei verið með veiðikort. Þarf ég að fara á veiðikortanámskeið?

Já. Allir sem hyggjast stunda almennar skotveiðar á Íslandi á öðrum dýrum en sel og mink, þurfa veiðikort. 

Þarf ég að eiga byssu til þess að geta farið á skotvopnanámskeið?

Nei. Námskeiðin eru ætluð þeim sem eru að sækja um skotvopnaleyfi og þar af leiðandi hafa þátttakendur ekki leyfi til að eiga byssu fyrr en að loknu námskeiði.

Þurfa meðmælendur umsækjanda um skotvopnaleyfi að vera sjálfir með skotvopnaleyfi?

Nei en þeir þurfa að hafa náð 20 ára aldri.

Próf

Ég fékk 74% á prófi. Er ekki hægt að sleppa mér með þetta eina prósent?

Þú þarf að ná 75% til að standast prófið.

Ég féll, get ég tekið prófið aftur?

Þú getur upptökupróf í eitt skipti án þess að greiða aukalega fyrir. 

Skráning í upptökupróf fer fram í gegnum skráningarsíðuna. 

Þarf ég að fara aftur á námskeiðið ef ég næ ekki 75% á skotvopna- eða veiðikortaprófinu?

Nei, þú þarf ekki að sitja námskeiðið aftur. Ef annað námskeið er í millitíðinni, þá stendur þér til boða að hlýða aftur á fyrirlesturinn þér til upprifjunar. 

Þú getur upptökupróf í eitt skipti án þess að greiða aukalega fyrir. 

Skráning í upptökupróf fer fram í gegnum skráningarsíðuna. 

Hvar og hvenær get ég farið í upptökupróf vegna veiðikorta- eða skotvopnanámskeiðs?

Að jafnaði er hægt að taka upptökupróf í sal í Reykjavík og ákveðnum fræðslumiðstöðvum á landsbyggðinni á því tímabili sem námskeiðin eru í gangi.

Hvað geri ég til þess að fá skírteini þegar ég er búinn að standast skotvopnaprófið?

Þú ferð til sýslumanns- eða lögreglunnar þar sem þú skilaðir inn gögnunum og sækir skírteinið. 

Sum embætti senda skírteinið strax að námskeiði loknu.

Ég er með lesblindu, er hægt að fá lengri próftökutíma?

Hægt er að óska eftir lengri próftíma vegna lesblindu eða annarra námsörðuleika. 

Nemendur sem hyggjast taka próf í Reykjavík hafa samband við Umhverfisstofnun. 

Nemendur á landsbyggðinni hafa samband við þá fræðslumiðstöð sem þeir hyggjast taka prófið hjá.

Hvað þarf ég að hafa með mér í prófið?

Þú þarft að hafa með þér skilríki og fartölvu/snjallsíma/spjaldtölvu sem getur tengst interneti. 

Gættu þess að hafa tækið fullhlaðið og taktu með hleðslutæki til öryggis. 

Athugið að innskráning í próf er gerð með rafrænum skilríkjum.

Ég komst ekki í bóklega prófið. Hvernig sný ég mér í því?

Ef þú kemst ekki í bóklega prófið að einhverjum orsökum getur þú fundið annan tíma sem hentar á skráningarsíðunni.

Hvar sé ég hvaða próftímar eru í boð og hvar?

Á skráningarsíðu skotvopna- og veiðikortanáms Umhverfisstofnunar er hægt að sjá yfirlit yfir próftökustaði og tímasetningar prófa. Þar getur þú valið tíma sem hentar og skráð þig í próf.