Úðun garða, í landbúnaði og garðyrkju – Notendaleyfi

  1. Hvaða reglur gilda um meðferð plöntuverndarvara og notendaleyfi?
    Um meðferð plöntuverndarvara og notendaleyfi gilda efnalög nr. 61/2013 og reglugerð nr. 980/2015 um meðferð varnarefna.
     
  2. Hvað fellur undir notkun plöntuverndarvara í atvinnuskyni?
    Samkvæmt reglugerð nr. 980/2015 snýr notkun plöntuverndarvara í atvinnuskyni að meðferð á hvers kyns plöntuverndarvöru s.s. plöntulyfi, illgresiseyði eða stýriefni í landbúnaði og garðyrkju eða við úðun garða og útivistarsvæða í einka- eða almenningseign, til þess að hefta vöxt, varna sýkingum eða skemmdum í gróðri af völdum hvers kyns lífvera eða til þess að stýra vexti plantna.
     
  3. Hvað er notendaleyfi fyrir plöntuverndarvörum?
    Notendaleyfi er leyfi sem veitir nafngreindum einstaklingi heimild til þess að kaupa og nota í atvinnuskyni plöntuverndarvörur í landbúnaði og garðyrkju, þar með talið við garðaúðun. Umhverfisstofnun sér um að gefa út notendaleyfi fyrir plöntuverndarvörum.
     
  4. Hvað þarf að gera til að sækja um notendaleyfi?
    Til þess að einstaklingur geti sótt um notendaleyfi þurfa eftirfarandi skilyrði að vera uppfyllt:
    1. Að umsækjandi hafi lokið námi eða námskeiði þar sem fjallað er um meðferð plöntuverndarvara. Umsækjandi skal hafa staðist próf sem sýnir fram á þekkingu hans.
    2. Að Vinnueftirlit ríkisins hafi staðfest að umsækjandi hafi yfir að ráða aðstöðu og búnaði sem staðist hefur skoðun og er nauðsynlegur til þess að tryggja örugga og rétta meðferð á þeim vörum sem sótt er um.
    3. Að umsækjandi sé eldri en 18 ára.
       
  5. Hvenær eru námskeið um meðferð plöntuverndarvara haldin?
    Landbúnaðarháskóli Íslands hefur séð um að halda námskeið um meðferð plöntuverndarvara og útrýmingarefna. Að jafnaði hafa námskeiðin verið haldin annaðhvert ár en það fer einnig eftir eftirspurn. Best er að hafa samband við Landbúnaðarháskóla Íslands í síma 433-5000 eða með tölvupósti endurmenntun@lbhi.is til að fá upplýsingar um næstkomandi námskeið og skráningar.
     
     
  6. Hvernig er sótt um notendaleyfi?
    Hægt er að sækja um notendaleyfi rafrænt í gegnum Þjónustugátt – Mínar síður á heimasíðu Umhverfisstofnunar. Umsækjendur skrá sig inn í Þjónustugátt með Íslykli eða rafrænum skilríkjum. Umsókn um notendaleyfi fyrir plöntuverndarvörum er fyllt út í gáttinni og hún tekur jafnframt við nauðsynlegum fylgiskjölunum.
  7. Hvað gilda notendaleyfin lengi?
    Gildistími notendaleyfa eru 5 ár.
  8. Hvað þarf að gera til að endurnýja notendaleyfi?
    Fyrir 1. janúar 2022 þarf eftirfarandi skilyrði að vera uppfyllt fyrir endurnýjun á notendaleyfi:
    • Að Vinnueftirlitið hafi staðfest að umsækjandi hafi yfir að ráða aðstöðu og búnað sem staðist hefur skoðun og er nauðsynlegur til þess að tryggja örugga og rétta meðferð á þeim vörum sem sótt er um.
      Eftir 1. janúar 2022 þurfa eftirfarandi skilyrði að vera uppfyllt fyrir endurnýjun á notendaleyfi
    • Að umsækjandi hafi sótt sér viðeigandi endurmenntun á því tímabili sem liðið er frá síðustu útgáfu notendaleyfis.
    • Að Vinnueftirlitið hafi staðfest að umsækjandi hafi yfir að ráða aðstöðu og búnað sem staðist hefur skoðun og er nauðsynlegur til þess að tryggja örugga og rétta meðferð á þeim vörum sem sótt er um.
       
      Sótt er um endurnýjun á notendaleyfi í gegnum Þjónustugátt – Mínar síður á heimasíðu Umhverfisstofnunar.
  9. Hvaða skilyrði þarf að uppfylla til þess að mega starfa við garðaúðun?
    Einstaklingur sem starfar í atvinnuskyni við úðun garða og útivistarsvæða í einka- eða almenningseign þarf  að vera með gilt notendaleyfi fyrir plöntuverndarvörum. Auk þess skulu aðilar sem stunda garðaúðun í atvinnuskyni hafa gilt starfsleyfi sem gefið er út af heilbrigðisnefnd í viðkomandi sveitarfélagi.
     
     
  10. Hvar er hægt að sjá hvaða einstaklingar eru með notendaleyfi í gildi?

Á heimasíðu Umhverfisstofnunar má finna lista yfir þá sem eru með notendaleyfi í gildi. Listann má finna hér.